भेटिएन् (गजल)

            (गजल)
          दिपेन्द्र हिमजाली, रुकुम पश्चिम 

जुन मन्दिरमा झुक्न सिकाइयो त्यहाँ भगवान भेटिएन ।
शिल्पाकारको मुर्ती भेटियो उसको पहिचान भेटिएन ।।

एउटी नारी प्रसव वेदनामा आफ्नो ज्यान गुमाउदै छे ।
उसलाई अस्पताल पुर्याउन गाउँमा जवान भेटिएन ।।

गोर्खालीको नाम पानाहरुमा सिमित बनेछ अचेल ।
रगत पसिना बेचिरहेका युवाहरुको सम्मान भेटिएन ।।

छोराछोरीको भविष्य बनाउन बाबा मुग्लान पस्यो ।
श्रम बेच्यो कमाएर आयो चुल्हामा जहान भेटिएन ।।

गाई मारेर गधा पोसिने मेरो पुस्ताको बस्ती भित्र ।
स्वरोजगारको नारा भेटियो उद्दारको विधान भेटिएन ।।